CEBU, Philippines - Gidunggab patay sa iyang kaugalingong amahan ang 37 anyos niining anak nga ex- convict didto sa Sitio Tabok, barangay Yati, lungsod sa Liloan niadtong Sabado sa alas 11:00 sa gabii.
Ang biktima mao si Romeo Balasabas, 37, anyos, minyo, way klarung trabaho, nagpuyo sa maong lugar ug usa ka ex -convict.
Samtang ang suspek mao si Lucio Balasabas, 67, amahan sa biktima.
Si PO3 Renato Pindo, Desk Officer sa Liloan Police Station mibutyag sa Banat News nga ang biktima hubog nga mipauli sa ilang balay ug gibunal-bunalan niini ang nagkalainlaing butang sulod sa balay.
Ang suspek nga nahigmata sa kalangas sa nanghagis niyang anak , wala na makaantos ilabi na nga wala na kini maminaw kaniya ug gilakip na siya sa pagbunal sa kahoy nga dala niini, hinungdan nga milanit siya sa iyang sundang ug gihansakan sa tiyan ang biktima.
Gumikan kay nasabak sa patyanan, gisuwayan kini og hatud ngadto sa Cortes General Hospital sa siyudad sa Mandaue diin kini ideklarar nga dead on arrival (DOA).
Sa pagrespondi sa kapolisan nga gipangulohan ni SPO4 Wenrie Pilapil naabtan ang suspek nga nagbitbit pa sa sundang nga nagkadugo ug bulontaryong mitahan kanila.
Ang suspek nagtingkagol na karon sa karsel samtang gihikay ang kasong ipasaka batok kaniya apan ang mga kabanay sa biktima ilabina ang mga igsoon sa biktima nga anak ra usab sa suspek dili interesado nga mopasaka og kaso batok sa ilang amahan. - BANAT NEWS