CEBU, Philippines - Giklaro ni Cebu City Market Administrator Raquel Arce nga gikonsulta na niya ang 90 ka mga tindera og buwad sa gawas sa Taboan Market kalabot sa ilang plano nga pabalhinon sila ngadto sa sulod sa merkado.
Kini human madawat sa konseho ang suwat gikan kang kapitan Abraham Desamparado sa San Nicolas –proper nga nangayo og eksplikasyon sa konseho kalabot sa maong pagpabalhin sa mga vendor .
Si Arce miatubang sa konseho sa miaging adlaw ug miingon nga ang tumong sa maong lakang mao ang pagpahapsay sa dagan sa Taboan market ug mapahimutang usab sa hustong puwesto ang mga tindera og buwad sanglit aduna ma’y nga bakante nga stalls sulod sa nahisgutang merkado alang kanila
Midugang siya nga igo ra siyang mipatuman sa programa ni Mayor Michael Rama nga nagmando sa pagbutang sa hustong puwesto sa maong mga tindera.
Hinuon sa konsultasyon niya ngadto sa mga hingtungdang tindera, si Arce nagkanayon nga wala siya makadawat og reklamo gikan kanila sa plano nga pagpabalhin kanila ngadto sa sulod sa merkado.
Ang mga bakanteng stalls sulod sa Taboan market gitagana unta kaniadto sa mga tindera og karne apan dyutay ra sila hinungdan nga may mga stalls nga walay gamit. (BANAT NEWS)