CEBU, Philippines - Election protest nga gisang-at sa magpapatigayong si Glenn Soco batok kang kanhi bise gobernador anhing Gregorio Sanchez gibasura sa Commission on Election.
Si Soco nga nahinabi sa Banat News mibutyag nga wala pa niya makuha ang maong order gikan sa Comelec apan matud pa sa iyang abogado nga si Atty. George Garcia nga gibasura kini sa 2nd Division. Gikwestyon ni Soco ang pagpagawas sa desisyon karong init na ang politika alang sa 2013 elections tungod kay nahuman man unta ang pagsusi sa ilang mga gikwestyong balota niadto pang Agosto.
“Napolitika sad ta ani, daghan gud nga politiko nga nanghilabot ug nag-impluwensya sa Comelec,” matud pa ni Soco.
Moduso si Soco og motion for reconsideration ngadto sa Comelec en banc apan kun ibasura gihapon kini modangop na siya sa Korte Suprema. Samtang gipadayag ni Soco nga subli siyang magpapili sa susamang posisyon tungod kay nailhan na siya sa katawhan. Siya maoy runningmate kaniadto ni Gob.Gwendolyn Garcia. (BANATNEWS)