CEBU, Philippines - Gipanid-an sa kapulisan ang Central Visayas ilabi na sa dakbayan sa Sugbu tungod sa report nga nia sa rehiyon ang organisadong grupo sa mga tulisan gikan sa Mindanao.
Si Sr. Supt. Rey Lyndon Lawas, kasamtangang hepe sa Regional Intelligence Division (RID)-7 ug mao usab ang hepe sa Lapulapu City Police Office (LCPO) miingon nga ang presensya sa grupo sa mga tulisan ila nang gihisgotan atol sa katapusan nilang tigom sa Regional Intelligence Coordinating Committees niadtong Lunes sa miaging semana.
Gihulagway ni Lawas ang maong grupo nga ‘very elusive’ ug makadaghang higayon nang nangigo dinhi sa rehiyon sa nanglabay’ng katuigan.
Sa pagkakaron, ang RID wala pa makadawat og kompirmasyon gikan sa mga intelligence personnel sa dapit diin magtago ang maong mga tulisan.
Giawhag ni Lawas ang publiko nga magmabinantayon ug mopahibalo dayon kun dunay kadudahang tawo sa ilang mga dapit.
“We are now checking safe houses and their possible contacts in the region,” padayag pang Lawas.
Si Police Regional Office-7 director Chief Supt. Marcelo Garbo Jr. mimando nang palapdan pa ang pagbantay sa mga establisamento sama sa banko, pawnshops, lending firms ug uban pa nga financial institution sa rehiyon.
“Possession of big amounts of money makes them an immediate victim,” matud ni Lawas.
Kahinumduman sa miaging buwan ang APL Corporation Pte. Ltd. and APL Logistics Phils. Inc., ug nagbase sa dakbayan sa Mandaue ang gitulis ug nasakiyo sa mga tulisan ang P360,000 mil. (BANAT NEWS)