CEBU, Philippines - Nagtingkagol sa San Fernando detention cell ang kapitan sa barangay Balud sa nahisgutang lungsod uban sa iyang mga kagawad ug tanod human sila sikopa sa kapolisan kagahapon sa alas 11:35 sa buntag tungod sa kasong malicious mischief.
Ang nasikop mao si Kapitan Reliso Enad, iyang asawa nga si kagawad Lolita Enad ug kagawad Arcadio Bacasmas, mga tanod nga sila si Reynaldo Basmayor, Manuel Abellana, Apolonio Bonghanoy, Doroteo Yoco, ug Fedilito Opada, ug Hector Hermosa, plumber. Ang misikop sa nahisgutang mga opisyal sa barangay mao si Inspector Crisanto Abellana, officer-in-charge sa San Fernando Police Sation, SPO3 Procolo Ando, SPO2 Victor Cueno, PO2 Jose Claire Palagtiosa, PO1 Salvador Saavedra ug PO1 Mary Jane Estrera.
Dala sa maong mga polis ang warrant of arrest batok sa napulo ka tawo nga giluwatan ni Municipal Trial Court (MTC) Judge Glenda Go sa lungsod sa San Fernando.
Si Engineer Ignacio Pagalan sa Municipal Planning Development Council (MPDC) maoy miduso og kaso batok sa mga hingtungdan.
Si Kapitan Enad nga nahinabi sa Banat News nagkanayon nga gawas sa malicious mischief gipasakaan usab sila og kasong theft ni Pagalan apan na-dismiss kini.
Ang problema nagsugod dihang si Pagalan nanaod og mga tubo alang sa linya sa tubig sa barangay Tongo ug Balud niadtong buwan sa Agusto sa milabayng tuig. Matud ni Kapitan Enad nga si Pagalan wala mananghid sa barangay bahin sa maong proyekto hinungdan nga gimanduan niya ang team leader nga si Abelardo Suico sa mga nag-instalar sa mga tubo nga ipahunong lang una ang pagtrabaho tungod kay ila pa kining estoryahan.
Apan pagkasunod adlaw nakita nila nga gipadayon ang pagpanaod sa mga tubo.
Gibatbat ni Kapitan Enad ang Section 27 sa Akta 7160 nga “No project or program shall be implemented by government authorities unless the consultations mentioned in Sections 2 (c) and 26 hereof are complied with, and prior approval of the sanggunian concerned is obtained.
Subay sa maong balaod gipatang-tang sa kapitan ang mga tubo sa ilang plumber sa barangay ug didto ipundo sa sa balay sa usa nila ka tanod aron dili kini kawaton.
Sa laing bahin, si Kapitan Enad nagkanayon nga nahibulong siya nganong nalutsan sila og warrant of arrest nga unta niadtong unang semana sa Abril niining tuiga miduso man ang ilang kampo og motion for reconsideration bahin sa kasong malicious mischief ngadto sa Regional State Prosecutor.
Miingon siya nga ikonsulta nila kini sa ilang abogado kay nagtuo siya nga bulok politika ang maong hitabo kay giatol gyud og Domingo ang pagsikop kanila samtang atol sa medical mission nga ilang gipahigayon sa ilang barangay.
Si Abellana sa iyang bahin, nagkanayon nga nadawat sa ilang warrant server ang WOA batok sa mga hingtungdan niadtong lang Biyernes sa hapon. Matud sa OIC nga walay gibutang sa warrant unsang adlawa puwede nilang sikopon ang usa ka suspetsado.
Si Abellana midugang nga igo lang silang mituman sa ilang trabaho sa pag-implementar sa balaod.
Si Enad kaalyado kini ni kanhi Mayor Lakambini “Neneth” Reluya nga kaatbang sa mayor karon sa lungsod sa milabayng eleksiyon sa 2010. - Brenda D. Batuto/WC (BANAT NEWS)