CEBU, Philippines - Patay ang usa ka lalaking giingong may kakulian sa pangisip human kini gituohang na-tripingan sa hubog ug gibunalan og bato sa ulo kagahapon sa kaadlawon sa sitio Talisay, Barangay Poblacion, lungsod sa Boljoon.
Patay na nga napalgan si Michael Andag, 34, nga giingong may deperensya sa pangisip hinuon nailhan sa kapolisan ang suspek nga si Arche Vallarta, 30, nga silingan sa biktima.
Gibutyag ni PO3 Reynaldo Rollon sa pakighinabi sa Banat News nga kagahapon sa kaadlawon usa ka Reymundo Villanueva, 56, ang midangop kanila ug mipahibalong adunay patay’ng lawas nga nakit-an niini sa dalan duol sa simbahan sa dihang nagpahigayon sila sa Dawn Rosary. Ang kapolisan sa Boljoon misusi sa maong dapit ug nasutang adunay samad sa walang bahin sa agtang ug bun-og sa walang mata si Andag ug wala nay kinabuhi.
Base sa gihimong awtopsiya sa patay’ng lawas nasuta nga nakaangkon og massive cerebral hemorrhage o grabeng pagdugo sa utok ang biktima nga maoy hinungdan sa iyang kamatayon.
Gituohang gihapak kini og gahi nga butang sa ulo sama sa bato.
Nianang pagkabuntag, usa ka 20- anyos nga molupyo sa sitio Mangga sa maong barangay ang mitug-an sa kapolisan nga nasaksihan niini ang krimen.
Ang suspek giingong unang misuway og binastos sa kaubang babaye sa testigo ug dihang gibadlong nangdapog kini ug milakaw.
Sunod nga gibuhat niini mao ang pagkulata sa biktima kinsa namatay human sa hitabo. (BANAT NEWS)