CEBU, Philippines - Tulo ka mga kagawad sa barangay Dumlog, dakbayan sa Talisay ang gikatahong maoy tigpasiugda og tigbakay diha sa ilang lugar matud ni Kapitan Charles Basillote, presidente sa Association of Barangay Council.
Si Basillote nga nahinabi sa Banat News kagahapon mibutyag nga ang maong mga kagawad matag Sabado ug Domingo magpasiugda og tigbakay bisan og walay okasyon sama sa pista.
Ang pagpatigbakay sa tulo ka kagawad giingong sulod na kini sa tulo ka buwan apan niadtong milabay’ng semana miundang na kini sa ilang ilegal nga kalihukan human duna nay mikisikisi. Matud sa kapitan nga gisigehan na niya og badlong ang tulo apan giingong nahimangod kini tungod kay nagtuong tungod sa politika ang pagbadlong kanila.
Tungod niini gipahibalo ni Basillote ang kapolisan ug mibahad nga kun maaktohan ang tulo sa ilang ilegal nga kalihukan pasakaan gyud niya kini og kaso.
Gawas sa Dumlog gikatahong sa ubang mga barangay sa Talisay giingong dunay mga opisyal usab sa barangay ang nagpasiugda og ilegal nga sugal sama sa tigbakay ug kini tukion karong adlawa sa sesyon sa ABC.
Si Supt. Eddie Recamara ang hepe sa kapolisan sa Talisay sa pakighinabi sa Banat News nagkanayon nga gihingusgan sa kapolisan ang kampanya kontra ilegal nga sugal.(/EIM) (BANATNEWS)