CEBU, Philippines - Sugod karong Hulyo 30 ning tuiga higpit nang ipatuman sa Department of Transportation and Communication (DOTC) ang Republic Act 10054 o Motorcycle Helmet Act of 2009 nga balaod nga nagmando sa pagsul-ob og ‘prescribe’ nga crash helmet alang sa tanan nga magsakay og motorsiklo drayber man o nag-angkas dinhi sa nasud.
Kini human giluwatan ni DOTC Secretary Mar Roxas ang Implementing Rules and Regulation (IRR) ug Joint-DOTC ug Department of Trade and Industry (DTI) administrative order alang sa implimentasyon sa maong balaod.
Tuyo sa maong balaod nga malikay sa grabeng kadaot ang motorista kun makasugat og aksidente.
Sa maong balaod, ang DTI gimandoang estriktuhon ang pagpatuman sa kamandoan sama sa paghatag og silot sa mga malapasong manufacturers, importers, traders, wholesalers, distributors, retailers, service providers ug mga ahente niini kalabot sa Philippine Standard (PS), Safety Certification Mark Scheme sa Bureau of Product Standards (BPS).
Gitahasan usab sa DOTC ang Land Transportation Office (LTO) nga ipatuman kini pinaagi sa pagdakop sa mga magmotorsiklong wala magsuot og standard safety helmets.
Si Engineer Mario Guadiano nga maoy product manager sa Bureau of Product Standards sa DTI sa press conference nga gipahigayon iyang gipadayag nga ang matang sa helmet nga gitugot nga isul-ob sa motorista kinahanglang makapanalipod sa ulo sa higayon nga maaksidente.
Dugang pa niya nga kadto rang adunay tatak nga sticker gikan sa ilang buhatan nga nagsigurong nakapasar kini sa standards ang mahimong suoton.
Adunay tulo ka matang sa helmet nga gitugot sa DOTC kini ang half-face helmet, full-faced helmet, ug kadtong helmet ra apan kinahanglang pulos kini adunay tatak sa DTI.
Ang wala mag-agi og tatak sa DTI o walay sticker sa DTI kompiskahon kini ug pamultahon ang motorista. Kinahanglang ang driver ug angkas magsuot niini apan walay labot ang mga drayber sa traysikol.
Si LTO-7 Regional Director Raul Aguilos sa press conference nga gipahigayon miingon nga nagpadayon na karon ang ilang pagpakatap og kasayuran ngadto sa mga motorista bahin sa maong balaod.
Gipasabot ni Aguilus nga base sa maong balaod ang madakpan nga nagsul-ob og dili ‘prescribed’ nga helmet o wala gyud magsul-ob og helmet makabayad og P1,500 nga multa alang sa unang kalapasan, P3,000 alang sa ikaduha, P10,000 sa ikatulo ug pagkanselar sa lisensiya sa drayber.
Samtang kadtong mobaligya og motorsiklo nga dili mopakapin og standard safety helmet aduna say multa. - BANAT NEWS