CEBU, Philippines - Gumikan sa nagkadaghang mga hulga sa demolisyon sa pipila ka mga kabalayan sa dakbayan sa Sugbu gimandoan ni Mayor Michael Rama ang Division for the Welfare of the Urban Poor (DWUP) sa pagsusi pa sa ubang mga lugar nga dunay susamang problema aron dili maabtan sa panahon nga maisyohan na og notisya sa demolisyon.
Dugang pa ni Rama nga moabag usab sa DWUP ang mga abogado sa City Legal Office nga magsilbing “law firm” alang sa publiko.
Nagkanayon si Rama nga dili na angayan nga magpaabot pa og demolisyon ug sugdan mentras sayo pa ang paghilot sa mga lugar nga dunay problema sa luna.
Kahinumduman nga 168 ka pamilya sa sitio San Miguel sa barangay Apas ang nabalakang demolison human gusto nang bawion sa pamilyang Godinez ang yuta nga ilang gipuy-an.
Laing 70 ka pamilya sa tulo ka mga sitio sa barangay Luz ang nag-atubang usab og susamang problema diha sa sitio Langka, sitio Mabuhay ug sitio Lubi sa maong barangay.
Ang pangulo sa Nasudnong Katawhang Kabos (Nakabos) nga si Evangeline Abejo malaumong makakuha og positibo nga resulta sa ilang problema pinaagi sa tabang sa kagamhanan sa siyudad. - BANAT NEWS