CEBU, Philippines - Nahunong ang pagdungog sa kaso sa dihang giatake og sakit nga hubak ang usa sa testigo sa linuog nga krimen sa pagpatay sa 6-anyos nga si Ellah Joy Pique kagahapon diha sa korte.
Samtang gipangutana ang testigong si Richard Ian Bansuan bahin sa nakita niining paglabay sa usa ka putos nga gidudahang mao ang patay’ng lawas ni Pique kalit kining giatake sa hubak ug wala na makapadayon pa.
Sa wala pa motukar ang iyang sakit kini miingon sa korte nga nakakita siya og usa ka lalaking langyaw gikan sa sulod sa usa ka ‘Pajero’ nga naghinayhinay og padagan sa mingaw nga lugar sa barangay Sayao sa lungsod sa Barili.
Gibutyag ni Bansuan dihang siya naduol sa maong sakyanan nagkatinutukay sila sa maong lalaking langyaw. Matud pa niya mipalayo siya’g gamay gikan sa gihunungan sa maong sakyanan ug nakita niya nga adunay gipagawas nga usa ka gamay nga ‘sako’ ang maong langyaw gikan sa luyo sa iyang sakyanan ug gihagbong kini sa ubos sa bung-aw.
Kini giingong nahitabo niadtong Pebrero 8 sa gabii. Nianang pagkasunod adlaw Pebrero 9 napalgan ang patay’ng lawas ni Pique diha sa ubos sa maong bung-aw.
Samtang siya gikutikuti sa abogado sa biktima nga si Atty. Inocencio Dela Cerna nangluspad kini ug gipaningot ug mihangyo og recess, nasuta nga giatake sa iyang hubak si Bansuan kinsa nagpunay og hingos sa iyang inhaler.
Matud pang Dela Cerna nga ang witness mitug-an kaniyang naglisod kini og ginhawa maong gitugutan ni RTC-Branch 6 Judge Ester Veloso nga ipadayon ang pagdungog sa sunod nga sesyon.
Apan gihulagway kini sa depensa nga ‘arte’ lamang o ‘drama’ ang gibuhat ni Bansuan ug dili sila kombinsido sa pangangkon niini nga gihubak siya.
Matud pa sa amahan sa biktima nga si Renante Pique nga si Bansuan masakiton gyud ug dili palang dugay nahospital.
Gitumbok nga suspek sa maong kaso mao ang manag-uyab nga sila si Bella Ruby Santos ug ang uyab niining Briton nga si Ian Charles Griffiths. (/EIM) - BANAT NEWS