CEBU, Philippines - Si Kongresista Gabriel Luis Luigi Quisumbing misang-at og balaodnon nga maghatag og kasayon sa mga senior citizen (SC) sa sayo nga pagbotar sa umaabot nga piniliay sa tuig 2013. Ang House Bill 5963 nga giulohan og Early Voting for Senior Citizens Act of 2012 magmando sa paghatag og espesyal nga sentrong botohanan ang mga SC sa umaabot nga election.
Matud pa ni Quisumbing nga usa ka adlaw sa dili pa ang election ang tanang botante nga SC magparehistro sa buhatan sa Municipal o City Election Registrar diin adto usab sila mokasar sa ilang boto sa adlaw sa election.
Gipasabot ni Quisumbing nga ang paghatag sa mga edaran og tukmang higayon ug lugar diin sila makakasar sa ilang boto sa adlaw sa election maoy pagtuman sa mando sa batakang balaod sa tanang mga Filipino nga kalipikado sa pagboto nga mobotar gayud sa panahon sa piniliay.
Matud pa ni Quisumbing nga ang maong balaod nagmando sa tanang Filipino nga nagpangidaron og gikan sa 18 anyos pataas basta makahimo pa ang lawas sa pag-adto sa precincto nga kinahanglang manginlabot sa piniliay.
Tungod niini katungdanan sa mga magbabalaod nga hatagan og maayong higayon ang mga SC nga makasalmot gayud sa piniliay pinaagi sa paghatag kanila og linain nga botohanan gikan sa mga normal og panglawas nga mga botante.
Sa nangaging mga election nasaksihan ni Quisumbing ang kadaghan sa mga SC nga nanguli sa ilang balay nga wala makabotar kay wala makaantus sa kataas sa oras sa ilang binarug nga nagpaabot nga mapupos ang linya sa mga botante nga nagpaabot sa ilang turno nga makasulod sa precincto ug makakasar sa ilang boto.
Miingon si Quisumbing nga maoy hinungdan nga gisang-at niya ang HB5963 aron hatagan og kasayon ang mga SC sa pagsalmot sa piniliay karong 2013 ug sa tanang mga piniliay nga umaabot. (BANATNEWS)