CEBU, Philippines - Si Samsam Gullas, apo ni Kongresista Eduardo Gullas sa unang distrito sa lalawigan sa Sugbo mipadayag nga wala siya mabalaka bisan pa og mga banggiitang politiko ang iyang ikaatbang sa umaabot eleksiyon sa sunod tuig.
Apan wala pa siya mokompirma kung unsa nga posisyon ang iyang daganan o kung hatagan siya og higayon nga mokandidato sa umaabot nga piniliay.
Matud ni Samsam nga bisan usa ka dakong hagit sa matag tawo kun mosalmot kini sa politika, iyang gipadayag nga wala siya mahulga bisan pa og mga banggiitang politiko ang iyang mga ikasangka. Kini tungod kay alang kaniya aduna siya’y katakus nga makigsakbang kanila tungod sa iyang kaalam.
Niadtong tuig 2010 si Samsam didto mikasar sa iyang boto sa barangay Tanke, sa dakbayan sa Talisay uban sa iyang apohan nga kongresista ug niadtong tuig 2011 mibalhin siya sa pagparehistro sa barangay Dumlog diin marehistro ang iyang amahan nga si Gerald Anthony Gullas.
Hangtud karon ang pamilyang Gullas padayon pa sa ilang sabot-sabot apan wala pa kini hingpit nga hukom kung kinsa ang mokandidato sa umaabot nga eleksiyon.
Apan si Samsam nagpadayag na kini sa iyang kaandam nga modagan sa bisan unsang posisyon.
“Open ko anything, open ko nga i-congress ko, open ko nga mag-mayor, open gihapon ko nga motabang gihapon ko like last election”, ni Samsam pa. (/WC) - BANAT NEWS