CEBU, Philippines - Tungod sa giluto nga adobo duha ka apartment ang naugdaw ug usa ka tawo ang naangol human sa sunog nga miulbo kagahapon pasado ala-una sa hapon diha sa dalan F. Llamas ug Osmeña sa barangay Punta Princesa ning dakbayan sa Sugbo.
Sa pakighinabi sa Banat News ni Cebu City Fire Marshal Aderson Comar kini mibutyag nga ang hinungdan sa maong sunog mao ang grabeng kainit sa kawa nga gilutoan og adobo.
Tungod sa kainit sa alisngaw sa kawa ang wire sa kuryente sa kisame nga dunay bombilya nalanay ug natagak sa nag-aso asong mantika nga dunay gilutong adobo nga itinda unta sa usa ka kan-anan.
Ang pagtugpa sa maong wire sa mantika miresulta sa pagkatap sa sunog.
Matud pa ni Comar nga usa ka Rey Casido, 23, nakaangkon og 2nd degree burns sa iyang bukton kinsa giingong maoy nagluto sa adobo sa usa ka dakong kawa nga pwerte nang inita maong dihang nagsugod na ang kalayo dali kining mikatap sa kusina ug sa mga kasikbit nga duha ka apartments nga ginama sa mixed materials.
Sumala pa sa report sa DyAB kagahapon, dunay mga residenteng mipasangil nga nakatulog ang nagbantay sa gilutong adobo ug tungod kay duol ra kaayo ang tangke sa liquified petroleum gas (LPG) miulbo kini.
Ang grabeng kainit sa panahon kagahapon usa sa giingong nakadugang sa paspas nga pagkatap sa kalayo hinungdan nga giisa dayon ngadto sa 2nd alarm ang alarma. Mokabat sa P300 mil ang danyos sa maong sunog.
Hinuon wala maproblema ang kabomberohan sa ilang pagresponde tungod kay daplin ra sa dalan ang nasunog.
Samtang si Lucrecia Meramontes nga tag-iya sa duha ka apartment nga naugdaw mibutyag nga naproblema siya karon kung unsay ibuhi sa ilang pamilya nga diha nila gikuha sa abang sa ilang mga apartment. - BANAT NEWS