CEBU, Philippines - Gitakda nga matapos na karong umaabot nga Biyernes ang demolisyon sa mga gitukod nga tindahan sa palibot sa Kawasan falls sa lungsod sa Badian.
Kini ang gitug-an sa Cebu Provincial Planning officer, Engr. Adolfo Quiroga atol sa ekslusibong pagpakighinabi sa Sugbo Tv newsteam ug Banat News.
Matud pa ni Quiroga nga mao kini ang adlaw nga iyang gisaad ni Gob. Gwendolyn Garcia sa katumanan sa gimando niya nga ipaguba na sa hingpit ang tanang gitukod nga mga tindahan sa maong lugar.
Gani matud pa ni Quiroga gamay na lang ang ilang tiwasonon sa pagguba kay nabungkag naman nila ang gibabag sa nagbuhagay nga tubig gikan sa nagbusagak nga tubig gikan sa dakong pangpang sa Kawasan.
Hinuon si Quiroga miingon nga mananghid pa siya sa gobernador ug sa Provincial Legal office kalabot sa mga estraktura nga anaa sa kilid nga bahin sa maong lim-aw nga gitugpahan sa tubig kun unsay angay buhaton niini.
Ang pagpahawan sa maong lugar gikan sa gitukod nga mga estraktura gihimo aron nga di maguba ang natural nga hitsura sa maong lugar aron labi kining makadani og dugang mga turista nga moduaw sa maong dapit. - BANAT NEWS