CEBU, Philippines - Naangol ang usa ka tawo human kini pusila sa gidudahan niyang mga tulisan didto sa Pepito Beach sa barangay Jubay, lungsod sa Liloan sa miaging gabii. Ang biktima mao si Dinnes Sarmiento, 23, ulitawo, nga nagpuyo sa maong dapit.
Si PO3 Renato Pedo sa kapolisan sa nahisgotang lungsod nga nahinabi sa Banat News miingon nga ang duha ka wala hiilhing lalaki nga nagsakay og motorsiklo mihunong sa maong dapit nga gidudahang manulis.
Dihang nahiagi ang biktima paingon sa ilang balay gipusil kini human madungog nila ang gisulti niini nga “nia na sad mo diri?”
Nasabak ang biktima sa dapi-dapi ug gibiyaan kini sa duha ka kriminal kinsa gipangita pa karon sa kapolisan.
Gihatod sa tagtungod ang biktima ngadto sa Vicente Sotto Memorial Medical Center sa dakbayan sa Sugbo.
Si PO2 Pedo miingon nga nagtuo ang biktima nga ang maong mga lalaki maoy tigpanulis sa maong dapit panahon sa kagabhion. (BANAT NEWS)