CEBU, Philippines - Gisulong sa mga walhong militanteng pundok ang kampo sa Central Command sa barangay Apas sa dakbayan sa Sugbu apan diha ra sila kutob sa ganghaan niini, ang grupo midemanda sa militar nga pahawaon ang mga tropa niini sa ilang mga lungsod.
Ang Bayan Muna ug Pambansang Pederasyon ng Kababaihang Mambubukid sa Pilipinas mipasangil sa mga sakop sa 78th Infantry Battalion nga nangabuso kanila, ang maong batalyon nadestino sa Pinamungajan, Aloguinsan ug Toledo City.
Apan si Lt. Col. Christopher Tampus, ang tigpamaba sa AFP-Centcom kinsa miatubang sa mga militante miingon nga kung duna silay reklamong pagpangabuso batok sa mga sundalo angayang adto nila kini ireklamo sa kapolisan o mopasaka og pormal nga reklamo diha sa ilang buhatan.
“Dapat you get the name of the military and file a formal complaint because wa na namo gi-tolerate,” matud pang Tampus.
Sa linaing interbyu kang Lt. Col. Nolasco Mempin, ang battalion commander sa 78th IB miingon nga dili nila mahimong kuhaon ang mga sundalo sa maong dapit sanglit mao kini ang nagbantay sa subling pagbalik sa NPA sa Sugbu.
Matud pa ni Mempin nga ang Toledo, Aloguinsan ug Pinamungajan mao ang mga lungsod nga sayon sudlon sa mga rebelde. Kini nag-atubang sa Negros island nga mao nalay nahibiling dapit diin naglihok ang NPA.
Di palang dugay, ang NPA mipahibalong buot nilang mobalik sa Sugbu. Ang Sugbu gideklarar nang insurgency free pipila ka tuig na ang nakalabay gikan sa paglingkod ni Gov. Gwendolyn Garcia.
Si Mempin midugang kung dunay reklamo angayang adto nila kini isang-at sa CentCom o ba kaha sa Commission on Human Rights. “We are not tolerating soldiers who abuse their power instead we will dealt it accordingly,”matud pang Mempin. (BANAT NEWS)