CEBU, Philippines - Gilusad sa Social Security System (SSS) ang unom ka buwan nga condonation program o pagpasaylo sa penalty sa mga nautang nga salapi sa mga membro niini nga wala kabayri sulod na sa dugay na nga panahon.
Si Janice Caballes, hepe sa accounting section sa SSS mibutyag kagahapon atol sa Alagad sa Serbisyo Sibil sa DYMR Radyo ng Bayan Cebu nga ang condonation program karong tuiga gibuksan sugod sa miaging Abril, 1, 2012 ug tak-opan sa Septembre 30, 2012.
May upat ka grupo sa mga membro sa SSS nga mangungutang nga makapahimus ning maong programa nga naglakip sa mga membro nga giisip nga utangan tungod kay ang gibayad nila sa SSS wala iremit sa ilang mga gitrabahoang kompaniya o amo.
Ikaduha, ang mga benepisyaryo sa mga membro sa SSS nga utangan ug namatay nga wala kabayad sa utang, nga gumikan sa pag-condone sa ilang penalty, ma-claim sa maong mga benepisyaryo ang katibuk-ang kantidad nga ihatag sa SSS nga dili na kuhaan sa silot kun penalty sa utang sa namatay nga miyembro.
Ang condonation program alang niining grupo molungtad og usa ka tuig gikan Abril 1, 2012 hangtod sa Marso 31, 2013.
Ika-tulo nga grupo nga makapahimus niining maong condonation program sa SSS mao ang mga membro nga gusto na gyud nga mobayad sa ilang utang.
Ika-upat nga grupo, mao kadtong mga mokubra sa ilang retirement benefit o pension nga mga retirado ug kadtong mi-apply og total disability pension.
Ang maong grupo kinsa utangan sa SSS makakobra sa hingpit nga kantidad sa ilang kobrahonon nga way iban nga penalty kun karon sila magsugod og claim niini ning panahon sa pagpahigayon sa maong condonation program sa SSS.
Matud pa ni Caballes nga mas maayong pahimuslan kini sa mga membro nga utangan pinaagi sa pagbayad sa hingpit sa lawas ra sa ilang nautang sa SSS kay mapasaylo-gawasnon man sila gikan sa pagbayad sa tubo kun silot unta sa maong utang nga nagpatong-patong sukad pa sa unang buwan sa pagkapakyas nila pagbayad hangtod niining panahona.
Miingon si Caballes nga dili ra ba sa tanang higayon gipatuman sa SSS ang condonation program.
Ang unang condonation program gipahigayon niadtong tuig 2003 hangtod 2009, gisundan niadtong 2011, ug human niining tuiga wala na usab hisayri kun kanus-a na usab mopatuman ang SSS ning maong programa, sumala pa ni Caballes. (BANATNEWS)