CEBU, Philippines - Kapin sa P100 mil ang katibuk-ang danyos sa sunog nga miulbo didto sa barangay Newbago sa lungsod sa Asturias niadtong Domingo sa alas 11:40 sa buntag .
Ang naugdaw nga balay gipanag-iya ni Paulina Susosco Baluya, 82 , byuda ug nagpuyo sa maong lugar.
Si PO3 Joel Mata sa Asturias Police Station mibutyag sa Banat News nga ang duha ka mga apo nga nagpangidaron og 4 ug 5 anyos maoy nagduwa og posporo sa sulod sa lawak sa maong balay nga wala mabantayi.
Sumala sa mga silingan nga kalit lang miulbo ang kayo sa sulod sa balay ug nag-iyahay nalang sa pagpanggawas ang tagbalay sa pagsalbar sa ilang kinabuhi.
Pag-abot sa mga bombero gikan sa Asturias ug Balamban naugdaw na ang balay kay ginama kini sa gaan nga mga dapat.
Matud sa mga bombero nga nakatampo usab ang hilabihang kainit sa panahon sa dali nga pagkaugdaw sa maong balay
Hinuon way nakalas o naangol sa maong sunog. (BANATNEWS)