CEBU, Philippines - Nasikop sa kapolisan ang usa ka gipasanginlang drug pusher ug laing tulo ka mga batan-on human makuhai og ilegal nga drugas (shabu) atol sa usa ka buybust operation sa sitio Seawage sa Brgy. Pusok sa dakbayan sa Lapulapu sa milabay’ng gabii.
Ang mga nasikop mao sila si Alvino Rubio, 33, Rex Corlon, 23, Niño Ferer, 24, ug Wilmer Ching, 37, mga residente sa maong dapit.
Matud pa ni Sr. Insp. Rogelio Pineda nga nangulo sa maong operasyon nga notado na si Rubio nga mamaligya og shabu sa maong dapit hinungdan sa ilang paglusad sa maong operasyon.
Naaktohan usab diha sa dapit sila si Corlon, Ferer ug Ching ug nakuhaan og gagmay’ng pakete sa gituhoang shabu.
Si Rubio nakuhaan og lima ka pakete, Corlon tulo ka pakete, Ferer duha ka pakete ug duha usab ka pakete kang Ching nga pulos may mga sulod nga gidudahang shabu.
Pipila na ka mga residente sa maong dapit ang mireklamo na sa dayag kaayong pagpamaligya og ilegal nga drugas ni Rubio sa ilang dapit nga gidayo na og ubang tawo nga magsabasaba sa ilang dapit.
Ang upat mag-atubang og kasong kalapasan sa RA 9165 ubos sa Art. II Sec. 5 ug 11 samtang gipaabot ang resulta sa eksaminasyon sa ebidensiya nga nakuha gikan sa mga suspetsado. (BANATNEWS)