CEBU, Philippines - Dunay kaugalingong interpretasyon si Mayor Michael Rama sa kung unsay alerto nga buhaton sa kapolisan, dili magdungan og pangaon aron masigurong aduna gyud polis nga nagbantay.
Mao kini ang nabantayan sa mayor human iyang nakit-an nga daghang sakop sa Special Weapons and Tactics sa miaging adlaw nga nagdungan og pangaon diha sa usa kan-anan duol sa Provincial Capitol.
“Kuyaw kaayo nang sitwasyona, what if dunay kalit nga moduol nila nga mga kontra, unya daplin pa gyud kaayo sila sa dalan,” matud pa ni Rama.
Gikatakdang makigtagbo si Rama kang Cebu City Police Office Director Melvin Buenafe aron matun-an ang angayang buhaton pa sa kapolisan sa paglambo sa seguridad. (BANAT NEWS)