CEBU, Philippines - Andam na ang tanan alang sa pagsaulog sa Ika- 491 nga tuig nga pagsaulog sa Kadaugan sa Mactan (KSM) sa umaabot nga Abril 27, 2012.
Kini ang gibutyag ni Lapulapu City Mayor Paz Radaza ug Konsehal Harry “Don” Radaza atol sa press conference kagahapon.
Ang reenactment sa KSM karong tuiga maoy ika-11 nga higayon sukad ipatuman ang buhing paghulagway sa nahitabo sa isla sa Mactan niadtong misung ang mga Katsila nga gipangulohan ni Ferdinand Magellan ug nakigsambunot ni Datu Lapulapu niadtong Abril 27, 1521.
Matud pa ni Mayor Radaza nga bisan og P1.2 milyones ang ilang gahin sa KSM karong tuiga apan iyang gipaniguro nga puno sa surpresa ug kalipay ang masaksihan sa mga langyaw ug local nga turista nga mosaksi sa KSM.
Subay sa usa ka semanang kahihukan sa KSM mohatag usab og kalingawan sa pagkaon matag gabii ang mga dagko ug inilang hotel sa Sugbu ilabi na sa dakbayan sa Lapulapu.
Human sa maong reenactment sa KSM isunod dayon ang “Kadaugan Street Party” ( KSP) diin sulod sa duha ka adlaw, Abril 27 ug 28 magsadya ang kadalanan sa ML Quezon Avenue gikan sa unang taytayan hangtod na sa ikaduhang taytayan isip kasaulogan sa kadaugan ni Datu Lapulapu sa eskrima nila ni Ferdinand Magellan 491 ka tuig na ang nakalabay.
Samtang si Lapulapu City Police Office Director P/SSupt. Rey Lyndon Lawas sa iyang bahin nagkanayon nga ilang pahugtan pag-ayo ang seguridad sa maong kalihukan.
Matud pa ni Lawas nga adunay 50 ka mga PNP outpost nga ilang ibutang palibot sa dakbayan sa Lapulapu.
Uban usab niini ang mga sakop sa Philippine Air Force nga abagan sa mga sakop sa Unified Task Force, TF Motorsiklo, BPATS, BPSO ug mga K9 dogs alang sa kaluwasan sa buot mosaksi sa KSP. Samtang si Embler Mendoza ang Chairman sa Tourism Commission sa dakbayan sa Lapulapu mibutyag nga ang mga artista nga modala sa papel atol sa KSM mao si Richard Quan sa papel ni Datu Lapulapu , Geneva Cruz isip Reyna Bulakna ug Patrick Garcia nga maoy modala sa papel ni Ferdinand Magellan nga ang tanan ubos sa pagdumala sa PAGCOR. (/WC) (BANATNEWS)