CEBU, Philippines - Malaumon si Governor Gwendolyn Garcia nga walay kasamok o kagubot nga motumaw dinhi sa Sugbu human makonbikto sa kasong parricide si Dinagat Island Congressman Ruben Ecleo Jr., ang giilang Supreme Master sa Philippine Benevolent Missionaries Associations (PBMA).
Kini ang pangindahay sa gobernador dihang gisukit siya sa taga media bahin kang Ecleo kansang kaso dinhi magsukad sa dakbayan sa Sugbu.
Si Ecleo nahukman sa korte nga mabilanggo sa tibook kinabuhi ug pabayron usab og kapin sa P25 milyones nga danyos.
Si RTC 7 Judge Soliver Peras sa Branch 10 maoy mipakanaog sa hukom batok kang Ecleo pinaagi sa mga ebidensya nga nagpamatuod nga sad-an kini sa kasong pagpatay og unay sa iyang asawa nga si Alona Bacolod Ecleo, niadtong tuig 2002 ug napulo na ka tuig ang nakalabay.
Nagtuo ang gobenador nga ang mga Sugboanon mahigugmaon sa kalinaw ug dili kinaiya niini nga mosagop sa kasamok ug dili gustong mag-apil-apil sa kagubot, busa walay angay kabalak-an bisan ang huwes ug ang pamilya niini bahin sa pagpakanaog og hustisya pabor sa kaliwat sa asawa ni Ecleo nga maoy kihante. - (BANAT NEWS)