CEBU, Philippines - Ang grupo sa Kinatas-ang Kahugpungan sa Kapupud-an Datus Alimaong (KKDA) diha sa barangay Lawaan, dakbayan sa Talisay kinsa nalambigit kabahin sa kagubot sa demolisyon sa lote ni Atty. Raul Sesbreño wala angkona sa laing grupo sa mga Datu sa KKDA.
Si Datu Tapas ug Datu Sibuyan kinsa nahinabi kagahapon sa Banat News nangangkon nga ang ilang grupo maoy lehitimo ug rehistrado kini sa Securities and Exchange Commission (SEC).
Apan gibutyag sa duha ka Datu nga kaniadto ang maong grupo kauban nila apan mibiya sa ilang grupo.
Kaniadto ang ngalan sa grupo mao ang Supreme Council of Datus Alimaong (SCODA) apan human nga si Datu Bontito Leon Kilat ug ang mga sakop niini mitiwalag sa grupo giilisan na ang pangalan sa grupo ngadto sa KKDA.
Ang grupo sa Lawaan nga gipangulohan sa usa ka Datu Timog giingong sakop ni Datu Bontito Leon Kilat.
Mipasangil sila si Datu Tapas ug Datu Sibuyan nga ang mga mitiwalag nga grupo nakapakauwaw sa KKDA.
Kahinumduman nga niadtong Domingo sa milabay’ng semana mitumaw ang tensiyon diha sa lote ni Sesbreño dihang ang grupo sa Alimaong ang mitukod og estraktura diin matud nila nga ang balay sa usa nila ka kauban nga ginganlan og “Elsa” wala maapil sa writ of demolition. (BANATNEWS)