CEBU, Philippines - Milanat pa una og dugay atol sa ginukdanay tali sa duha ka mga pulis nga sakop sa Mobile Patrol Car 019 una pa nila nadakpan ang usa ka lalaki human nalamba sa karsada dihang nabulasot sa lungag ang ligid sa iyang motorsiklong gisakyan kagahapon sa alas-2 sa kaadlawon diha sa Corner General Maxilom Avenue ug S. Osmeña sa North Reclamation Area ning dakbayan sa Sugbu.
Ang suspek nga seryosong naangol human nakaangkon og pangos sa kalawasan giilang si Joel Noel Armero, 35, taga barangay T. Padilla. Ang nakadakop kaniya mao sila si PO1 Necio Torreon Jr., PO1 Gerry Molina sakop sa MPG Car 019 ug sila si PO2 Capuyan ug PO1 Unabia sakop sa MPG Car 015.
Segun sa report nga sila si Torreon Jr., ug Molina nagpatrolya sa may P. Del Rosario St., ug Sikatuna St., sa barangay Day-as dihang ilang nakit-an ang usa ka lalaki nga wala magsul-ob og helmet sakay sa kolor itom nga Yamaha Mio plate number 6677 OT.
Ang suspek nga nakabantay nga dunay patrol car nga nagsunod kaniya, nipasirit og padagan hangtud ug milihay kini sa nag checkpoint nga sakop sa Parian Police station diha sa may Day-as.
Pag-abot sa crossing sa Carreta, miliko sa tuo ang suspek paingon sa Pier 4 diin gisugat gihapon ang mga sakyanan. Matud nilang Torreon ug Molina nga nangayo na sila og back-up sa patrol car 015 nga misugat na kanila.
Matud ni Molina nga pagkabantay sa suspek nga dihay misugat nga laing patrol car nisamot kakusog ang dagan niini hangtud nga nabulasot ang ligid sa lungag ang ligid niini sa iyang motorsiklo ug nalamba.
Ang suspek nagunitan ni Torreon apan kalit mibunot sa dalang .45 nga kalibre sa armas ug gipusil si Torreon apan wala makaigo.
“Wala gyud ko kabantay nga may armas nga dala, ako man siyang nakuptan, nibunot man sa armas mao to gipusil ko pero diri sa duol sa akong tiil, mao tong akong naposasan,” asoy pang Torreon nga nahinabi sa Banat News.
Ilang girekisa ang suspek nakuhaan kini og laing .45 nga armas diha nga giluklok sa hawak ingon man usa ka digital bag nga may sulod nga lima ka dagkong pakete, trese ka medium nga pakete ug usa ka small nga pakete nga pulos gituohang ang sulod shabu, glass tooter ug disposable lighters nga narekober sa kapulisan.
Laing tulo ka magazines ug siyam ka bala sa .45 nga pistola, usa ka celphone ug nakuha usab sa crime scene ang usa ka slug sa bala. Si Sr. Supt. Melvin Ramon Buenafe, hepe sa Cebu City Police Office (CCPO) sa press conference nagkanayon nga base sa mga text message nga ilang nabasahan sa cellphone ni Noel ang usa ka .45 nga armas maoy gibayad sa shabu sa kliyente sa suspek.
Dugang nakuha nilang impormasyon nga si Noel bag-ohay lang nakagawas sa Muntinlupa tungod sa kaso gihapon sa ginadiling drogas. Kasong Direct Assualt, Illegal Possession of Firearms and Ammunitions, Section 11 ug 12 sa Republic Act (R.A) 9165 ang ilang giandam nga kaso batok sa suspek.
Sa pikas bahin, usa ka 22-anyos nga lalaki usab ang nadakpan City Intelligence Branch (CIB) kagahapon sa hapon diha sa Sitio Cañares barangay Lorega.
Si Fabian Rafols nadakpan atol sa buy-bust operation ug nakuhaan og usa ka paketeng may sulod nga gidudahang shabu ug laing pito ka medium packs sa iyang posisyon.Kapin sa P7 mil nga cash nga gituohang halin ang nakuha usab sa kapulisan. (BANATNEWS)