CEBU, Philippines - Tulo ka armadong lalaki nga naglakip sa usa ka menor de edad nga pulos taga dakbayan sa Talisay, ang nadakpan sa kapolisan sa sitio Caimito, barangay Labogon, dakbayan sa Mandaue kay nagpasalba sa ilang mga armas sa miaging buntag.
Ang nadakpan mao si Anglo Jake Garces, 25 anyos, Junrey Bacalso, 29 ug usa ka 17 anyos nga bayong-bayong nga pulos taga barangay Tabunok, dakbayan sa Talisay.
Si PO2 Richard Ares sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News mibutyag nga ang maong mga suspetsado nagpasalba sa ilang armas de fuego didto sa balay ni Marcial Ancila sa Basak.
Matud pa ni PO2 Ares nga si Garces nga kapuyo sa anak nga babaye ni Ancila miadto sa balay sa naulahi kay buot kuhaon niini ang iyang kapuyo kay iyang dad-on ngadto sa Tabunok.
Apan tungod kay nagdumili sa pagkuyog ang kapuyo gipugos kini ni Garces nga misangpot sa kalagot sa amahan sa babaye nga si Ancila hinungdan nga miulbo ang ilang panaglalis.
Si PO2 Ares miingon nga mibiya si Garces sa maong dapit apan mibalik kini nianang alas 5:00 pasado sa buntag kuyog na sa laing duha ka mga kauban nga naglakip sa usa ka bayong-bayong. Unya mipasalba kini sa ilang mga armas de fuego sa makadaghang higayon nga nakapahadlok sa mga molopyo sa maong dapit.
Unya may mipahibawo dayon sa kapolisan sa Presinto 3 sa barangay Basak busa milihok dayon si Inspector Wilson Abot nga maoy hepe sa Presinto 5 kinsa maoy nangunay sa pagtubag sa alarma pinaagi sa paghimo og road block sa mga dalan sa barangay Labogon.
Milungtad og pipila ka gutlo nga pagpaabot nila ni Inspector Abot sa maong dapit hangtod nga miabot si Garces nga nagmaneho sa Honda Civic Sedan nga nagdala sa plate number GFP 690 ug kasakay niini si Bacalso ug ang bayong-bayong.
Gipara dayon nila ni Inspector Abot ang tulo ug dihang girikisa nahinolan niini ang .45 kalibre nga pistola nga giluklok ni Garces sa iyang hawak uban sa mga buhing bala niini ug duha ka mga kabhang.
Samtang ang 17 anyos usab nga kauban ni Garces nakuhaan og 357 nga armas de fuego nga puno sa mga bala ug mga kabhang usab niini nga gituhoang gipaboto didto sa balay sa ginikanan sa kapuyo ni Garces.
Si PO2 Ares nagkanayon nga ang tulo kinsa pulos nakainom og ilimnong makahubog wala makapakita og mga dokumento sa ilang mga armas de fuego hinungdan nga gidakop ug gibalhog sila karon sa sulod sa detention cell sa Presinto 3.
Ugma Martes gitakda sa kapolisan ang pagpasaka og kaso nga kalapasan sa Republic Act 8294 kon ilegal nga paghupot og armas nga mobuto. (WC)(BANAT NEWS)