CEBU, Philippines - Tungod sa gipaabot nga pagdagsa sa mga manimba sa Sugat-Kabanhawan Festival sa lungsod sa Minglanilla karong adlawa (Domingo) dunay ipahigayong traffic rerouting aron dili magsamok ug maghuot ang karsada diha sa national highway.
Si Superintendent Timmar Jamio Alam, hepe sa Minglanilla Police Station sa pakighinabi niini sa Banat News kagahapon nagkanayon nga ang mga sakyanan nga naggikan sa Sugbo paingon ngadto sa habagatan moliko kini sa wala paingon ngadto sa Lower Calajo-an lahos ngadto sa Tulay road, dayon sa barangay Tungkop, dayon liko sa tuo paingon ngadto sa Springwoods Village road.
Ang karsada sa Springwoods Village one way kini sa maong adlaw.
Ang sakyanan nga naggikan sa habagatan paingon ngadto sa Amihanan o Sugbo moliko kini sa tuo diha sa barangay Tungkop, lahos sa barangay Tulay, dayon ngadto sa Lower Calajo -an ngadto sa national highway ug dayon sa ilang destinasyon.
Matud usab ni Alam nga dunay ipakatap nga mga polis ug mga personnel sa Minglanilla Traffic Commission (MITCOM) nga magmando sa trapiko. (BANATNEWS)