CEBU, Philippines - Pormal nang nanumpa sa atubangan ni Gobernador Gwendolyn Garcia si Alejandrita Meca isip bag-ong konsehal sa dakbayan sa Danao puli sa bana niining si Jesus Lazaro Meca nga mitaliwan na sa laing kalibotan niadtong Marso 1, 2012 gumikan sa sakit nga kanser.
Kauban sa pagpanumpa sa biyuda ni Meca atubangan sa gobernador mao si Provincial Board Member Ivy Durano Meca ug Danao city Vice Mayor Ramonito Durano III.
Gibutyag ni Konsehal Meca nga sa iya unyang pag-asumer sa katungdanan sa ngalan sa iyang bana sa ilang lugar giplano niyang palamboon pa ang sektor sa kababayen-an ug ang EGWEN program ni Gobernador Garcia.
Sa samang higayon gitug-an usab ni Vice Mayor Durano sa mga sakop sa media nga maglahugay sila karon sa konseho aron kahatagan usab og komitiba si Meca.
Human manumpa , si Meca mitambong dayon sa sesyon sa konseho sa siyudad sa Danao
Gituohan nga ang daghan pang mga kalamboan sa konseho sa Danao ang makab-ot karong ang asawa sa namatay nga si konsehal Meca mopadayon sa mga gilaraw niini nga kaayohan sa dakbayan sa Danao. (BANATNEWS)