Random drug test maayong ipadayon

CEBU, Philippines - Gidayeg ni Gov. Gwendolyn Garcia ang gihimong random drug testing ngadto sa mga drayber sa pampublikong sakyanan ug labing maayo kun kini magpadayon.

Ang Land Transportation Office maoy nangusog sa pagpahigayon og kinalit nga random drug testing sa mga draybers diha sa kadalanan ug ning mga panahona diha sa mga terminal.

Matud pa ni Garcia nga kinahanglang walay bisyo ang mga drayber ilabi na sa ilegal nga drugas tungod kay naa sa ilang mga kamot ang kinabuhi sa mga pasahero.

“Mas maayong ipadayon ang random drug testing kay ang driver naa gyud sa iyang mga kamot ang kasigurohan sa kinabuhi sa mga pasahero,” pasabot pa ni Garcia.

Dugang pa ni Garcia nga anaa ra gyud sa drayber nga mobalibad kun ugaling pagamiton kini sa ginadiling drugas.

Nasayran nga sugod sa nakalabay’ng semana ug niadtong Lunes ang LTO nakasakop og 21 ka mga drayber nga positibo sa paggamit og ilegal nga drugas ug gikumpiskahan sa ilang mga lisensya.  - BANAT NEWS

Show comments