CEBU, Philippines - Naalarma ang gobernadora sa mikatap nga hulagway diha sa Facebook kalabot sa mga grupo sa molupyo nga mihikap, migakos ug gani mipatong sa butanding o tuki diha sa kadagatan sa amihanang bahin sa Sugbu. Ang Facebook picture sa maong insidente giingong gi-post niadtong Marso 31 sa usa ka ginganlan og Liza Sesaldo nga dunay nakasuwat nga kini nakuha sa lungsod sa Oslob.
Apan ang mayor sa maong lungsod nga si Oslob Mayor Ronald Guarin mihimakak nga sa ilang lungsod nakuha ang maong hulagway.
Ang lungsod sa Oslob nabantog na tungod sa eco-tourism bunga sa pagbutho sa mga butanding o tuki ug kini silingang lungsod sa Boljoon.
Apan sa nadawat nga report ni Gov. Gwendolyn Garcia ang maong litrato nakuha sa barangay Granada sa lungsod sa Boljoon ug dili sa Oslob human giingong nakuha kini sa pukot sa mga mananagat ug gidala kini sa daplin.
Ang maong butanding giingong gibuhian sa mga mananagat og balik sa lawod. Apan sa wala pa nila kini madala og balik sa lawod miabot ang mga tawo nga nakiatkiat pagpakuha og hulagway ug gani duna pay babayeng mipatong sa bukobuko sa maong talandugon kaayong matang sa isda.
Ang mga bloggers ug twitters sa internet wala makauyon sa gihimo sa maong mga tawo ug mihulagway kanilang mga ‘ignorante’ o kuwang lang gyud sa impormasyon kabahin sa unsa ka peligro ang ilang gibuhat sa maong isda.
Si Garcia nagkanayon nga iyang gimandoan si Boljoon Mayor Teresita Celis sa pagsumitir og report kalabot sa maong insidente bisan paman og una nang mihimakak ang mayor nga dili sa iyang lungsod nahitabo ang mikatap nga hulagway.
Mipasabot si Garcia nga imposibleng sa Oslob nahitabo ang maong insidente tungod kay aduna nay mga fish wardens nga nagbantay sa maong mga isda sa maong lungsod. EIM - (BANAT NEWS)