CEBU, Philippines - Ang tanang barangay secretary ug treasurer sa 80 ka mga barangay sa siyudad sa Sugbo gipaabot nga makadawat og binuwan nga allowance nga tag P2,000 sugod karong tuiga.
Samtang ang mga barangay kapitan ug kagawad magpadayon sa pagdawat og monthly allowance sa susama gihapong gidak-on.
Nasugdan na sa pagpatuman sa miaging tuig ang pagdawat sa kapitan og P5,000 matag buwan samtang P3,000 ang madawat sa kagawad nga allowance matag buwan.
Mimando na usab si Mayor Michael Rama sa iyang mga sakop sa pag-umol og guideline alang niini.
Ang siyudad sa Sugbo migahin og P32 milyones alang sa maong programa sa mayor.
Kini naglangkob sa P4.8 milyones alang sa mga barangay kapitan sulod sa 12 ka buwan, P23.04 milyones alang sa 640 ka mga barangay kagawad ug ilakip na niini ang mga Sanggunian Kabataan (SK) chairman, ug P3.8 milyones alang sa barangay secretary ug treasurer.
Ang pag-release sa maong mga allowance ipaagi sa Barangay Affairs Unit nga nahimutang sa buhatan sa opisina sa mayor.
Kahinumdoman nga mihangyo kaniadto ang mga barangay secretary ug treasurer nga kahatagan usab unta sila og P3,000 nga binuwang allowance. (BANAT NEWS)