CEBU, Philippines - Sa paningkamot ni Gobernador Gwendolyn Garcia, nakab-ot ang positibo nga kalamboan sa suliran tali sa kagamhanan sa Liloan ug sa tag-iya sa Michael Slipways Incorporated nga dugay nang panahon nga nagbinaslanay og kiha sa korte.
Si Gov. Garcia kinsa nakasabot nga sila si Mayor Duke Frasco sa Liloan ug ang tag-iya sa Michael Slipways, Inc. pulos nagtinguha nga magsabot-sabot nangita dayon siya og paagi nga makabaton og katumanan ang maong pangandoy.
Kini pinaagi sa iyang pagtugot sa gihangyo sa tag-iya sa Michael Slipways nga ilibkas ang cease and desist order nga giluwat sa gobernador batok sa operasyon sa baraderohan sa maong kompaniya gumikan sa kakuwang niini og permiso sa ilang pamatigayon ug uban pang kalapasan niini.
Pinaagi sa pagtugot nga makapadayon kini sa iyang operasyon, makapadayon na sila sa pagdawat og mga barkong ibaradero sa ilang lugar. Apan gitataw sa gobernador nga bugti sa iyang kamandoan sa pagpalibkas sa cease and desist order, mao ang pagbakwi usab sa maong kompaniya sa motion to cite indirect contempt nga giluwat niini batok kang Mayor Frasco.
Samtang ang mga opisyal sa Department of Environment and Natural Resources (DENR) mibahad nga moluwat usab sila og cease and desist order sa maong kompaniya sa higayong mapakyas kini pagtuman sa mga requirement nga gipangayo sa kagamhanan alang sa pamatigayon sa lungsod sa Liloan. (BANATNEWS)