CEBU, Philippines - Kapin sa 100 ka mga tablon nga Red Lawaan ang gikumpiskar sa gipahigayong operasyon sa Department of Environment Natural Resources (DENR) niadtong Biyernes sa alas 12:06 sa hapon diha sa barangay Sibonga, dakbayan sa Carcar.
Uban sa maong operasyon ang Philippine Coast Guard (PCG) ug Philippine Navy (PN).
Si Rolando Punzalan Jr., PCG Central Visayas Station Commander mibutyag kagahapon sa Banat News nga gibanabanang mokantidad tanan ngadto sa P91,000 ang 157 ka mga tablon nga naembargo. Ang maong mga kahoy gibiyahe gikan sa Surigao sa Mindanao duna kini gitas-on nga 10 ft., duha ka pulgada ang gibag-on ug walo ka pulgada ang gilapdon ug gituohang gamiton paghimo og furniture.
Gibutyag ni Punzalan nga ang DENR maoy nakadawat og report kabahin sa mga kahoy nga walay mga dokumento nga gibiyahe padulong dinhi sa Sugbu hinungdan nga ang maong ahensiya nangayo kini og tabang kanila ug sa PN aron sikupon ang maong kontrabando nga gikarga og dakong pumpboat.
Ang mga crew sa bangka nga sila si Warren Lumuntad, Sacarias Lumuntad, Anthony Lumuntad ug Bernard Ebueza, taga probinsiya sa Surigao gikustodiya na sa DENR.
Ang maong mga tripulante giingong wala motug-an sa pangalan sa tag-iya sa maong mga kahoy ug kung asa usab nila kini ihatud. Gisusi pa usab sa PCG kung rehistrado sa Maritime Industry Authority ang maong pumpboat nga karon gidala na sa Pier 3 sa dakbayan sa Sugbo. Si Punzalan midugang nga ang DENR mao nay mopahigayon og lawom nga imbestigasyon sa maong insidente.
Kahinumdoman nga ang nahitabong mga flashfloods nga mibanlas sa Cagayan de Oro City ug Iligan City niadtong milabay’ng bulan sa Disyembre gibasol ngadto sa walay puas nga pagpamutol og kahoy sa kabukiran sa Mindanao. (BANATNEWS)