CEBU, Philippines - Nakaginhawa og gamay gikan sa kahadlok nga mapalayas ang 29 ka pamilya diha sa barangay T. Padilla gumikan kay wala madayon pag-demolis sa ilang mga panimalay.
Sumala pa sa pangulo sa Nasudnong Katawhang Kabos (Nakabos) nga si Evangeline Abejo nga mihatag og unom ka buwan nga extension si Judge Estella Alma Singco sa Regonal Trial Court -Branch 12.
Matud pa ni Abejo nga mipasalig ang buhatan sa Division for the Welfare of the Urban Poor (DWUP) nga gipangulohan ni Atty. Collin Rosell nga motabang sa mga posibleng solusyon nga unom ka buwan nga pagproseso sa mga dokumento.
Dugang pa ni Abejo nga usa sa nakita nilang solusyon mao nga angayan paliton sa siyudad ang maong luna nga dunay gidak-on nga 4,834 metro kuwadrado.
Nasayran nga pipila na diay ka tuig nga naumol ang mga suhestiyon nga angayan paliton sa siyudad ang maong luna apan wala lang kaayo kini matagaan og pagtagad kaniadto.
Pipila sa mga naapektahang pamilya 58 na ka tuig namuyo sa maong dapit.
Una na nga gipadayag sa presidente sa T. Padilla Villa Urban Poor Association nga si Paulita Batalona nga gipanag-iya sa usa ka pribadong tawo ang maong yuta busa kinahanglan gyud ang abag sa gobiyerno sa giatubang nila nga problema. (BANATNEWS)