CEBU, Philippines - Gidudahang gitulis una patya ang 88-anyos nga pensyonada sa SSS sulod sa balay niini sa barangay Dawis Sur, lungsod sa Carmen niadtong Martes sa alas 6:15 sa gabii.
Ang biktima mao si Cleofe Geonzon, 88, byuda, ug nagpuyo sa maong lugar, uban ang iyang apo, ug usa ka pensyonada.
Si PO2 Jezrhel Into sa Carmen Police Station mibutyag sa Banat News nga ang apo sa biktima nga si James Paul Doce, 27, ulitawo, nananghid kining molakaw sa alas 4:00 sa hapon sa maong adlaw kay mitan-aw og basketball sa ilang barangay.
Apan sa iyang pagpauli nianang alas 5:30 na sa hapon iyang naabtan ang biktima nga nagbuy-od sa hagdanan paingon sa ilang kuwarto nga nagginhawa pa apan wala nay tingog.
Dali niya kining gi-report ngadto kang Kapitan Ranolfo Ybanez sa ilang barangay kinsa mao usab ang mitawag sa kapolisan.
Sa pagrespondi sa kapolisan uban ang municipal health officer nga si Dr. Elmer Batao, patay na ang biktima nga may mga samad sa iyang walang bahin sa nawong ug kamot.
Ang apo sa biktima nagtuo nga gitulis sa wala pa hiilhing tulisan ang biktima tungod kay nahanaw usab ang iyang gibilin nga cell phone nga nag-ungot sa charger ug ang iyang kwarta nga P800.
Ang kapolisan padayon pa sa ilang makuting imbistigasyon sa maong krimen. - BANAT NEWS