CEBU, Philippines - Gidul-itan ang ulo sa pagpusil ang usa ka mag-uuma samtang nakig-inom kini sa laing mag-uuma sa miaging hapon diha sa sitio Hagnom bukirang bahin sa barangay Lusaran ning dakbayan sa Sugbu.
Dead on the spot ang biktimang si Timoteo Magdadaro Puebla, 49, residente sa maong lugar human makaangkon og daghang samad pinusilan sa luyong bahin sa iyang ulo. Usa ka wala mailhing lalaki ang giingong mipusil sa biktima apan ang kauban niini nailhan nga si Ryan Doncillo alyas ‘Iti’ nga taga sitio Hagimit sa barangay Adlaon.
Sigun sa pasiunang imbestigasyon sa Homicide Section sa Cebu City Police Office (CCPO) pinangulohan ni SPO4 Rey Cuyos ug mga kaubanan nagbutyag nga nag-inom ang biktima uban sa laing mag-uuma nga si Sofronio Fernandez, 62, diha sa payag nga nahitaboan dihang miabot ang mga gikatahapan.
Ang asawa sa biktima nga si Fe Morales Puebla, 48, mibutyag nga nakabati siya og nagsunod nga buto sa armas ug sa paglingi niya iyang nakit-an nga naglumbaanay og dagan si Doncillo ug ang kauban niini paingon sitio Hagimit.
Samtang ang iyang banang si Puebla nag-ubo na sa lamesa sa payag ug patay na nga may daghang samad pinusilan sa ulo. Wala na maapsi sa mirespondeng grupo ni PO3 Pedro Maramara sa Cebu City Public Safety Company ang mga suspek.
Dugang pakisusi sa kapulisan nga niadtong 1996, ang biktima gipusil sa ilang lugar ug ang nakapusil niini nga ginganlan og Danny anaa na karun sa bilanggoan.
Si SPO1 Ruth Violango sa Homicide Section nga nahinabi sa Banat News nagkanayon nga ila karung gipangita si Doncillo tungod kay gituohan nilang igsuon sa nabilanggong si Danny ang kauban niining mipusil patay sa biktima.
Matud ni Fe nga niadtong 1996 gipusil ang iyang bana tungod kay gidudahan kining maoy mitug-an sa mga opisyales sa barangay bahin sa giingong marijuana plantation diha sa bukirang lugar sa Lusaran. (BANATNEWS)