CEBU, Philippines - Dunay foul play nga nakita ang mga imbestigador sa kamatayon sa usa ka lola nga retiradong kawani sa PhilHealth kinsa napalgang patay niadtong Martes sa gabii sulod sa iyang pinuy-anan diha sa Dr. Villalon Drive sa barangay Capitol Site ning dakbayan sa Sugbu.
Si Sr. Supt. Nestor Sator, PNP-Central Visayas medico legal officer nagkanayon nga iyang nasuta nga dunay daghang mga bun-og sa iyang suwang ug nawong ug fractured sa iyang bukog ang biktimang si Teresita Nengasca Cui, 75.
Matud ni Satur namatay si Nengasca tungod sa hemorrhage sa luyong bahin sa ulo nga posibleng inagian sa paghapak og gahi nga butang sa suwang, nawong ug ulo niini, dayon diha sa dughan hinungdan nga nangliki ang kabukogan sa biktima.
Siya midugang nga ang mamumuno posibleng nasuhito o kaila ra sa biktima sanglit wala mousig ang iro sa balay niini atol sa maong hitabo.
Tungod niining maong kalamboan, si Sr. Inspector Rolando Pinili, hepe sa Theft and Robbery Section (TRS) nagkanayon nga ila karung gipangita ang saksi nga makatumbok ug makaila sa responsable sa krimen.
Si Pinili miingon nga dili pa siya makasulti kun tulis o kaha panimawos ang anggulo nga maoy motibo sa pagpatay sa biktima.
Atol nga nadiskubrehan ang patay’ng lawas sa biktima niadtong Martes sa alas-11 sa gabii, ang mga mirespondeng kapulisan nakabantay nga nakay-ag na ang mga butang sa biktima lakip na ang box nga gisudlan sa mga alahas niini.
Ang mga sakop sa Crime Scene Investigation (CSI) nakarekober og duha ka boxes sa mga alahas sulod sa balay sa biktima diin dunay dugo ang nawong niini. (BANATNEWS)