CEBU, Philippines - Mga mahalong butang ang nasakiyo sa mga kawatan dihang gilungkab ang pinuy-anan sa usa ka Amerikano sa Block 1, New Orlenas St., El Monteverde barangay Lamac lungsod sa Consolacion niadtong Martes sa alas 5:00 sa buntag.
Ang nabiktima sa pagpanglungkab mao ang panimay nga gipanag-iya ni Terry Dale Davenport, 59.
Ang mga nasakiyong mahalong mga butang naglangkob sa usa ka Masonic gold ring nga mokantidad og usa ka gatus dolyares, laing usa ka school ring ug cellphone.
Matud ni PO2 Johneskie Romero sa Consolacion Police Station dihang nahinabi sa Banat News nakamata sayo sa kaadlawon tungod sa pagtingog sa ilang security alarm.
Dihang ilang gisusi ang palibot wala sila’y nakit-ang tawo nga nakasud sa ilang compound apan sa pagsusi nila nakita nila nga naguba na ang sliding window sa ilang mga lawak.
Diha nila mahibaw-ing gikawat na ang maong mga butang. Matud ni Romero ikaduha na kining higayon nga nabiktima sa pagpanglungkab ang maong langyaw. (Darrel Carumba/EIM) (BANAT)