CEBU, Philippines - Mokabat sa P44,000 nga salapi ang nasakiyo sa duha ka tawong misulay unta paglungkab sa usa ka establisamento sa barangay Umapad, dakbayan sa Mandaue sa miaging gabii apan nadakpan.
Ang nadakpan mao sila si Jereby Perus, 24, ug Ryan Mayor, 18, pulos molupyo sa maong dapit kinsa giingong misuway og lungkab sa Algonics Machine Shop nga gipanag-iya sa magpapatigayon nga si Alfredo Chua.
Si PO1 Ariel Gingco sa kapolisan sa Presinto 1 sa Mandaue City Police Office (MCPO) mibutyag nga nakadawat sila og alarma labot sa duha ka tawong nanglungkab sa maong tindahan.
Sa ilang pagresponde ilang naabtan si Mayor nga naglingkod sa usa ka traysikad nga nagpaabot sa gawas sa maong establisamento ug dihang ilang gisukitsukit mitug-an kini nga si Perus nakasulod na sa maong tindahan.
Tungod niini ilaha nalang gipaabot si Perus sa paggawas niini ug dihang kini migawas sa maong establisamento dali nila kining gidakop ug sa ilang pagrekisa nakita ang salapi nga P44,000 nga gituohang gikan sa maong establisamento. (BANAT NEWS)