CEBU, Philippines - Gipaabot nalang ni Konsehal Edgardo Labella sa dakbayan sa Sugbo nga taktakon siya pagka-majority floor leader sa iyang mga kauban sa konseho.
Matud pa ni Labella nga kung siya ang pabut-on dili na siya interesado sa maong posisyon tungod kay nasayud siya nga kuwang na og pagsalig kaniya ang ubang konsehal sukad siya mobiya sa Bando Osmeña -Pundok Kauswagan.
Giklaro ni Labella nga base sa house rule, dili mahimong mo-resign ang majority floor leader apan mawala siya sa maong puwesto kun ang mga kaubanan na niya sa konseho maoy mo-endosar sa pagpapahawa kaniya gikan sa maong posisyon.
Sayo niini gipadayag ni Bise Mayor Joy Augustus Young nga magtigom pa sila sa ubang konsehal alang sa sunod nga lakang nga ilang himuon batok kang Labella ug sa ubang mga konsehal kinsa mitapon na og laing partido.
Matud pa niya nga maglisod sila sa paghatag og komitiba sa mga konsehal nga posibleng mogamit niini alang sa pamolitika. Gawas kang Labella, ang mga konsehal nga dili kaalyado ni Young mao sila si Jose Daluz III, Edu Rama Jr. ug Ronald Cuenco.
Kahinumdoman nga ang mga resolusyon ni Labella nga giduso sa miaging adlaw giutingkay pag-ayo sa ubang konsehal apan gihulagway kini niya nga kabahin lamang kini sa demokrasya busa wala niya kini igsapayan.
Matud pa ni Labella nga iya trabaho lang ug wala siya maghuna-huna og kolor sa politika sa pagkakaron.
Dili hinuon siya masupresa, sumala ni Labella kung moabot ang panahon nga tangtangan siya og komitiba sa konseho.
Si Labella maoy chairman karon sa “laws and ordinances committee” sa konseho ug gihuptan niya kini sulod na sa dugay nga katuigan.(/WC) (BANATNEWS)