CEBU, Philippines - Usa ka Korean ang gipasakaan og kasong libelo sa iyang kababayang Korean tungod sa pagbutang niini og hulagway ug pag-post og bati nga pulong sa usa ka website nga nakadaot sa dungog sa reklamante ug sa asawa niining Filipina.
Si Kim Jae Ku, gipasakaan ug kasong libelo sa magtiayong Jin Hyun Park ug Marie Ann Park kansang kaso giduso ni Prosecutor Alex Gabud ngadto na sa korte human napakyas si Kim sa pagduso sa iyang counter affidavit aron unta matubag ang pasangil kaniya.
Samtang ang laing gikasuhan sa magtiayon nga kauban ni Kim mao silang Hong Gi Dong ug Kim Hyun Ju apan nabasura ang ilang mga kaso tungod sa kakulang sa ebidensya.
“ As to the identity of the three respondents only Kim Jae Ku has been sufficiently identified by the complainant,” pasabot pa ni Gabud.
Mirekomendar si Gabud og P10 mil nga piyansa bugti sa temporaryo niining kagawasan.
Base sa reklamo nga giduso ni Park, misaysay kini nga niadtong Hunyo sa miaging tuig, iyang higala nga si Hyun Woo Won, usa usab ka Korean ug iyang business partner ang mihangyo kaniya nga ipasusi ang website nga phil22cafe.
Ang phil22cafe usa ka website sa mga grupo sa Korean nga anaa magbase sa Sugbo diin kasagaran kini nga ablihan sa mga Korean ilabi na kadtong nangita og mga tunghaan ug katrabahoan.
Matud pa ni Park nga sa dihang iyang gisusi ang maong website nakurat nalang siya tungod sa giingong gipang post nga makadaot sa dungog nilang magtiayon sa mga suspek.
“ I proceeded to Consolate General of the Republic of Korea in Manila and had the post translated in English which had a tittle reads : Cebu solicitation for murder, fraud Jin Hyun Park and his wife Marie Ann Park’s picture,” matud pa ni Park.
Dugang pa ni Park nga iyang nakita nga ang nagsuwat sa maong pulong mao si basic7410 nga mao silang Dong ug Ju base sa iyang phil22cafe account. Samtang nakakita usab si Park og laing post nga gi-upload usab ni worn1153 nga ubos sa ngalan ni Ku.
“ In the said internet post there is picture of respondent Kim Jae Ku posing before the NBI Office in Manila and holding a printout of complainant’s picture,” matud pa ni Park. (BANATNEWS)