CEBU, Philippines - Patay ang usa ka magbalantay sa usa ka quarry site sa sitio Tayabas sa barangay Pulangbato, bukirang bahin sa dakbayan sa Sugbu human kini dunggaba sa kaubang magbalantay.
Si Geoffrey Miñoza Arinaza, 37, taga sitio Candarong sa barangay Pulangbato, nakaangkon og samad dinunggaban sa walang bahin sa iyang dughan nga maoy nakaingon sa iyang kamatayon.
Misuway unta sa pag-ikyas ang suspek sakay sa iyang motorsiklo nga giilang si Bimbo Comeso Leyson, 40, apan nadakpan kini sa miresponding kapulisan. Nakuha gikan kang Leyson ang usa ka hinagiban nga giingong gigamit niya sa pagdunggab.
Sigun sa pasiunang imbestigasyon nilang SPO1 Victor Ruel Ayuman, PO3 Lou Pagara, PO2 Julius Regis sa Homicide Section sa Cebu City Police Office (CCPO) padulong nang mangatulog ang mga tabahante dihang mibangon ang suspek ug giduol ang biktima ug gidunggab kini usa ka higayon.
Matud pa pagkahuman sa pagpanunggab misakay ang suspek og motorsiklo dayong sibat palayo sa nahitaboan.
Si Melchor Gorre kauban sa biktima maoy mitabang niini samtang ang iyang igsuong si Julius Gorre midangop sa barangay hall kinsa mao nay mitawag sa kapulisan.
Ang grupo ni PO3 Roderick Francia sa Station 8 nga daling miresponde sa alarma maoy nakadakop sa suspek, wala hinuon matino sa mga imbestigador ang motibo sa krimen. (BANATNEWS)