CEBU, Philippines - Usa ka minahan og coal nga giingong padayong nag-operate sa illegal nga paagi ang hingpit nga gipasirad-an sa mga tinugyanan sa Department of Energy (DOE-7) ug kapulisan sa bukirang bahin sa barangay Cansuji lungsod sa Argao kagahapon sa udto.
Ang gipasirad-an nga coal mine gipanag-iya sa usa ka Hilario Vasquez. Ang maong minahan una nang giisyuhan og cease and desist order sa DOE-7 aron mahunong na ang illegal nga operasyon niadtong petsa 2 sa buwan sa Nobiyembre sa niaging tuig.
Apan nadiskubrehan sa DOE nga wala tumana ang maong kamandoan hinungdan nga kagahapong adlawa giadto kini sa DOE ug gipasirad-an.
Matod ni PO2 Manuelito Abrenica, desk officer sa Argao Police Station dihang nahinabi sa Banat News ang mga sakop sa DOE-7 miadto sa ilang buhatan aron magpakuyog sa maong minahan aron ikapatuman ang kamandoan.
Ang kamandoan gilagdaan ni Engr. Esmael Yum ang OIC director sa Energy Resource Development Bureau sa Department of Energy sa DOE-7 nga naglatid nga ang maong minahan usa sa mga daghang ilegal nga minahan dinhi sa Sugbo ug tibuok Central Visayas nga wala dayun mapasirad-i sa ilang buhatan tungod sa kakuwang sa police power sa ilang ahensiya.
Apil sa giluwatang kamanduan sa DOE-7 ang pagsakmit sa tanang mga ekipo sa minahan aron gamitong ebidensiya sa posibleng pagpasaka nila og tukmang kaso sa tagdumala niini. (BANATNEWS)