CEBU, Philippines - Malampuson ang gilusad nga protest action sa mga militanteng pundok sa Sugbo ug mga sakop sa transport groups atubangan sa buhatan sa Department of Energy DOE-7 sa dalan Osmeña Boulevard kagahapon sa buntag nunot sa padayong pagsaka sa presyo sa lana.
Gipangulohan ang maong protest action sa Bayan Muna ug AMA-Sugbo ug sakop sa Nagkahiusang Drayber sa Sugbo (NADSU). Gisugdan ang protesta diha sa Fuente Osmeña Rotunda ug nagmartsa ang grupo paingon sa buhatan sa DOE-7 ug didto gilusad nila ang protesta.
Ilang gipalanog didto ang panawagan sa pagbasura sa Oil Deregulation Law nga maoy gipasanginlan nga nakaingon nga nagpatuyang lang ang mga kompaniya sa lana pagpa-umento sa ilang presyo.
Si Jaime Paglinawan sa Bayan Muna Central Visayas dihang nahinabi sa Banat News misaway usab sa Pantawid Pasada Program ni Presidente Benigno Aquino III kay matud pa daw wala kini bili.
Ang protesta gihimo dinhi sa Sugbu agi og pagsanong sa nasudnong protest action nga gilusad usab sa mga transport groups sa kaulohan.
Kagahapong adlawa upat ka mga siyudad sa Metro Manila ang nikanselar sa klase tungod sa protest action kini mao ang Quezon City, San Juan, Pasay City ug Parañaque City. (BANATNEWS)