CEBU, Philippines - Giklaro ni Bise Mayor Joy Augustus Young nga dili gikan sa ilang bulsa kondili sa iyang higala nga usa ka pribadong tawo ang mibayad sa mga advertisement nga nanggawas sa tulo ka mga mantalaan kagahapon kung diin naa ang iyang hulagway uban ni Kongresista Tomas Osmeña .
Matud pa ni Young nga dili isyu ang maong advertisement sanglit nagpakita lang kini sa achievements nila ni Osmeña nga sila nalakip kaniadto sa listahan sa Ten Outstanding Youngmen niadtong 1989 ug 1994.
Nalakip usab sa advertisement ang mensahe nga “Buy One Take One” ug gisuwat usab ubos nga bahin ang Bando Osmeña Pundok Kauswagan.
Gawas sa mantalaan aduna puy mga propaganda materials ang mikatap nga nagpakita sa mga testimonya sa tawo nga natabangan sa programa ni Young sa dihang konsehal pa kini kaniadto.
Ang kaatbang ni Osmeña sa politika nga si Mayor Michael Rama nagdumili sa paghatag og komento bahin niini.
Apan ang iyang ig-agaw nga kapitan sa barangay Basak San Nicolas nga si George Rama mikatawa lang sa maong advertisement ug dili siya motuo sa pangangkon ni Young nga laing tawo ang nagbayad niini.
“Tuo man ta ana uy. Klaro ana nga sila ang nagbayad anang advertisement,” palabtik pa sa kapitan kinsa midugang nga tataw nga publisidad ang gihimo sa BOPK gumikan sa kalig-on sa grupo ni Mayor Rama.
Nagtuo usab ang kapitan nga nakuyawan usab si Young sa iyang kandidatura gumikan kay lig-ong kaatbang si Konsehal Edgardo Labella.
Sumala pa sa kapitan wala silay planong kopyahon ang gihimo sa BOPK. (BANATNEWS)