CEBU, Philippines - Gipahibalo sa grupo sa kababayen-an sa dakbayan sa Talisay nga dili sila magpagamit sa mga politiko karong umaabot nga piniliay apan mosuporta sila ni bisan kinsa nga nakatabang sa ilang organisasyon matud ni Marissa Bering, president sa Women Federation sa tibuok dakbayan sa Talisay.
Kagahapon sa kasaulogan sa Women’s Day si Bering kinsa taga barangay Cansojong nga nahinabi sa mga tigbalita miklaro hinuong wala nila did-i ang ilang mga miyembro kung kinsay ilang pilion.
Ang maong grupo adunay 4,000 ka sakop gikan sa 22 ka barangay sa Talisay apan 2,000 lang ang nakatambong kagahapon tungod kay matag barangay gilimitahan lang nila og 100 ka miyembro nga makatambong tungod sa ka limitado sa lugar diha sa complex. Ang bulan sa Marso maoy giisip nga Women’s Day alang sa paghatag og bili sa kababayen-an ug ang pag-ila sa ilang papel sa katilingban, dungan usab niini ang pagpalambo sa ilang kaalam pinaagi sa panginabuhian, sports ug medical missions.
Sa laing bahin, ang mga konsehal sa siyudad nga sakop sa administrasyon uban nila ni Kongresista Eduardo Gullas ug Gerald Anthony Jr.o “Samsam” Gullas, Assistant Vice President for Finance and Administration sa University of the Visayas (UV) ug manager sa UV Green Lancer ang mitambong kagahapon sa maong kalihukan.
Ang kongresista mipahibawo kagahapon sa kababayen-an nga moduso siya og balaudnon aron ang adlaw sa pagsaulog sa Women’s Day mahimong “non-working holiday.” Gawas niini ang kongresista misaad nga mohatag og P1.5 milyones alang sa sinking fund sa maong kapunongan.
Si Samsam kinsa maoy guest speaker sa maong kalihukan nagkanayon kini nga “the power of women is the most powerful thing in this world.Women are one of the strongest people that I know. Naay saying nga behind a successful man is a woman.”
Matud ni Samsam nga iyang gihimong sanglitanan ang iyang kasinatian tungod kay gipalibutan siya sa upat ka mga babaye duha niini ang iyang mga manghud nga maoy magsige og badlong kaniya tungod sa iyang kakiat dihang bata pa siya, tungod sa pagmatuto kaniya nahimo siyang responsable nga tawo.
Ang iyang inahan kinsa usa ka negosyante ug maoy hinungdan nga mikuha ug mitapos siya sa kursong Bachelor of Science in Business Administration. Ug ang kataposan mao ang iyang apohan nga si Mingming nga gihulagway ni Samsam nga usa ka artist. - BANAT NEWS