CEBU, Philippines - Nasikop sa mga ahente sa Philippine Drug Enforcement Agency (PDEA) Central Visayas ang duha ka gidudahang tigpayuhot sa ginadiling drugas sa gihimong buybust operation niadtong Miyerkules sa hapon sa barangay Danglag sa lungsod sa Consolacion.
Ang nadakpan mao sila si Jomarie Arnoco, 33, nga maoy giilang level 2 drug pusher samtang nasikop usab ang giingong iyang bata-bata nga si Rey Abao, 26, pulos residente sa maong lugar. Si Intelligence Officer 2 (IO2) Jelou Anthony Paca, sa PDEA-7, nagkanayon nga si Arnoco anaa sa ilang listahan nga tigpayuhot og ginadiling drugas ug usa ka semana na nila kining gipanid-an.
Ang poseur buyer si IO2 Eugene Prieto
Nakuha sa posesyon sa suspetsado ang lima ka gagmay nga pakete nga gituohang ang sulod shabu nga nagkantidad og P2,500, improvised tooter, usa ka granada, cellular phone, P500 buy-bust money, usa ka color blue Honda XRM motorcycle, ug notebook nga listahan sa illegal nga transaksyon.
Matud ni Paca, si Arnoco usa na ka level 2 drug pusher ilang gipanid-an human sila makadawat og daghang reklamo sa mga silingan tungod kay giingong anaa ra kini sa duol sa tunghaan mamaligya og ginadiling drugas.
Apan daling mihimakak si Arnoco sa pasangil ug mitug-an kini nga ang dul-an P1 milyon nga iyang paninglunon nga anaa sa iyang notebook dili sa illegal nga kalihokan kundili sa iya kining negosyo nga baboy. Apan si Paca nga nahinabi sa The Freeman ang igsuong mantalaan sa Banat News nagkanayon nga dunay lista sa notebook nga utang nga moabot ngadto sa P480,000; P578,000, nga dunay gibutang nga pangan nga ‘bossing’ ug P240,000, nga kolektahonon sa 50 gramos. Hinuon nagkanayon si Paca nga ang pamilya ni Arnoco nga mibisita sa ilang buhatan kagahapon wala gyud maghisgot nga negusyante kini og baboyan.
“Kung naa gyud ni baboyan mo-question unta ang pamilya nganong gidakop nga naa may negosyo pero wala man,” matud ni Paca. Ang mga ahente sa PDEA nagplano nga i-sumiter ang SIM card ni Arnoco ngadto sa SIM forensic investigation sa Manila human duna silay nakuhang text nga nagkanayon “bantay diha padung na ang taga- PDEA diha” sa inbox sa cellphone ni Arnoco.
Ang mensahe nadawat, usa ka adlaw sa wala pa madakpi si Arnoco ug Abao. - BANAT NEWS