CEBU, Philippines - Hinayhinay nang mikunhod ang gidaghanon sa mga nabiktima sa sakit nga tipos sa lungsod sa Tuburan apan bisan paman niini aduna pa gyuy nakalas kagahapon sa buntag diha sa Vicente Sotto Memorial Medical Center.
Sa pakighinabi sa Banat News ni Provincial Health officer Dr. Cristina Giango, ang namatay nagpangidaron og 26-anyos kinsa duna nay daang sakit nga mikomplikar dihang nataptan kini og tipos.
Butyag pa ni Giango nga daghan pa hinuon ang miadto sa Tuburan District Hospital apan aron lang magpakonsulta sa ilang panglawas sanglit mikunhod na ang na-admit sa maong tambalanan kagahapon.
Samtang sa report sa Balitang Bisdak, nasayran gikan ni Renan Cimafranca sa DOH-RESU, padayon ang ilang pagpakatap og impormasyon sa publiko kalabot sa pagpanglimpyo sa palibot aron malikayan ang sakit nga tipos ug uban pang sakit.
Sa miaging semana kalit nga midagsa ang mga pasyente sa Tuburan District Hospital tungod sa maong sakit hinungdan nga gideklarar kini nga usa na ka outbreak sa walo ka barangay sa maong lungsod.
Upat na ang nakalas ug kapin sa usa ka libo ang nataptan sa maong sakit hinungdan nga nag-abot-abot ang mga medisina ug hinabang nga gipadala ngadto sa maong lungsod. - BANAT NEWS