CEBU, Philippines - Gipalig-on ni Mayor Jonas Cortes ang Liberal Party (LP) sa dakbayan sa Mandaue pinaagi sa pagpanumpa nila ni Konsehal Emmarie Lollipop Ouano Dizon ug Konsehal Editha Flores Cabahug nga hingpit na nga motipon sa maong partido.
Si Mayor Cortes nga maoy midumala sa maong oath taking mibutyag sa mga tigbalita nga gitinguha niya ang paghiusa sa mga dagkong pamilya sa dakbayan sanglit mao lamang kini ang paagi nga makab-ot ang dugang kalamboan sa Mandaue. Gitataw niya nga unang naghiusa ang ilang mga ginikanan nga politiko sa Mandaue kaniadto ug walay katarungan nga silang mga anak karon dili magkahiusa.
Dugang pa niya nga ang pagpanumpa nila ni Konsehal Ouano-Dizon ug Konsehal Cabahug maisip nga sinugdanan pa lamang sanglit daghan pang mga dagkong pamilya sa politiko sa dakbayan nga mosalmot sa maong panaghiusa.
Ang maong panumpa gitambongan usab sa mga sakop sa pamilya nila ni Konsehal Ouano –Dizon ug Cabahug.
Si Konsehal Ouano-Dizon nga nahinabi sa Banat News miingon ang iyang pagpanumpa may pagtugot sa iyang amahan nga si Provincial Board Member Thadeo Ouano ug sa iyang apohan nga si kanhi Mandaue City Mayor Alfredo Ouano. - BANAT NEWS