BACOLOD CITY, Philippines – Natuman ang usa sa mga katapusang hangyo ni Kong. Ignacio “Iggy” Arroyo nga makauli sa iyang lungsod sa Hinigaran, Negros Occidental nga sakop sa 5th district nga iyang ginsakupan sa buhi pa kini.
Tulo ka adlaw nga hayaon ang patay’ng lawas ni Iggy sa maong lungsod.
Sumala pa ni Grace Ibuna, ang long-time partner sa kongresista nga mao kini ang katapusang damgo ni Iggy nga madala sa ilang lugar ang iyang lawas.
“Mahal nya lahat ng mga taga-5th district,” matud pa sa masulob-ong si Ibuna ngadto sa mga tigbalita human sa pag-abot niini ug sa patay’ng lawas sa kongresista diha sa Bacolod-Silay Airport sa Silay City.
Kauban ni Ibuna ang mga anak ni Iggy nga sila si Bianca ug Bernardina, ug ang ilang mga anak nga sila si Gabrielle, Jolo ug Rafaela ug ubang sakop sa banay’ng Arroyo.
“We love him very much and I missed him. We have so many memories together,” matud pa ni Mike Arroyo, ang maguwang ni Iggy kinsa nag-uban sa igsuong si Marilou sa maong tugpahanan luwan sa usa ka pribadong eroplano pagkaalas 6 sa gabii sa samang adlaw (Lunes).
Matud pang Ibuna duha ka semana una pa makabsi sa kinabuhi si Iggy niadtong Enero 26, namugos si Iggy nga mopauli sa iyang distrito apan wala niya kini tuguti, si Iggy kasamtangang nagpatambal sa iyang sakit sa maong lugar.
“I hope you still keep on praying for Congressman Arroyo. He was a good man and his heart belongs here,” mao ray tubag ni Ibuna dihang gipangutana kini kung unsay mga katapusang gipamulong sa kongresista kaniya.
Matud pa ni kanhi bokal Enrique Miguel “Guding” Lacson gatosang mga tigpaluyo ni Iggy ang nagdala og kandila ug mga sulo nga nagpaabot sa pag-agi sa patay’ng lawas sa kongresista diha sa kadalanan sa Hinigaran nga gidunganan sa pagpabuto og firecrackers.
Ang haya gihimo diha sa St. Mary Magdalene Church sa Hinigaran. Si Ibuna mibutyag nga nagplano siyang motukod og foundation nga ipangalan kang Iggy nga tumong nga matabangan ang mga kabus sa edukasyon ug medical services. - BANAT NEWS