CEBU, Philippines - Usa ka biyuda kinsa namaligya og yuta nga may nag-ung-ong pa nga kaso sa korte sa dakbayan sa Mandaue gikuwestiyon karon sa mga tagtungod sa yuta nga iyang gibaligya ug sa nakapalit niini.
Ang nahisgutang biyuda giila nga si Maria Paz Lim kinsa mibaligya sa Lot 27 nga nahimutang sa sitio San Vicente, barangay Tabok, sa nahisgutang dakbayan sa kantidad nga P24 milyones ngadto sa San Vicente Ferrer Neighborhood Homeowners’ Association Inc. Inabagan sa United People’s Organization of Visayas Inc.(UPOVI) isip originator.
Subay sa gipirmahan nga tripartite memorandum of agreement, singko porsiyento sa maong kantidad bayran sa asosasyon kutob karong Marso 31, 2012.
Si Lim miangkon nga siya ang sole executor sa kabilin sa iyang bana nga si Henry Ngo Lim pinasikad sa kamandoan ni Regional Trial Court Branch 16 Judge Sylvia Aguirre Paderanga niadtong Nobiyembre 20, 2007 sa kasong Sp. Proc. No. 14927-CEB.
Apan ang Register of Deeds sa dakbayan sa Mandaue mitino nga ang maong titulo sa yuta eksklusibong propridad ni Antonio Lim Tanhu ug asawa nga si Dy Ochay, sa Tipolo, dakbayan sa Mandaue.
Kini ubos sa Sp. Proc. No. 8715-CEB diin si RTC Branch 8 Presiding Judge Macaundas Hadjirasul miila sa anak ni Tanhu nga si Lim Teck Chuan isip administrador.
Usa ka pinanumpaang pamahayag ni Lim nagkanayon nga si Henry bugtong lang anak ni Tanhu ug dili gani nila kadugo si Chuan.
Apan base sa marriage contract nila ni Paz, ang amahan ni Henry mao si Jacinto Ormoc Lim ug ang inahan mao si Lim Ngo Che Ye.
Sa miaging tuig, si Lim miduso og petisyon sa RTC Branch 8 aron angkonon ang pagka administrador sa maong luna nga iyang gibaligya apan giingong gibasura kini sa korte niadtong Enero ning tuiga.
Si Acting Deputy Register of Deeds Ramonito Quijano niadtong Pebrero 21, 2012 mimatuod nga anaa pa sa korte ang kaso sa maong luna nga ubos sa TCT No. T-17361-5423. - Gregg M. Rubio/WC (BANAT NEWS)